Takk for innsatsen, Jarle!

Ved utgangen av året går økonomisjef Jarle Bruun Olsen av med pensjon etter heile 29 år i teneste for Nissedal kommune.

Gjennom nær tre tiår har Jarle vore ein sentral del av kommuneorganisasjonen vår. Han har vore med gjennom store og små endringar, skiftande politiske prioriteringar og stadig nye krav til kommunal drift.

I alle desse åra har han vore ein trygg og stødig fagperson som har hatt eit særleg ansvar for å ta vare på kommunen sin økonomi.

For mange av oss er Jarle kjent som ein kunnskapsrik kollega med stor arbeidskapasitet, godt humør og eit ekte engasjement for kommunen.

Han har møtt både folkevalde, kollegaer og innbyggjarar med respekt og profesjonalitet, og han har alltid vore oppteken av å finne gode løysingar saman med andre.

Arbeidet til ein økonomisjef er ofte lite synleg for folk flest, men er avgjerande for at kommunen skal kunne levere gode tenester til innbyggjarane.

Gjennom sitt arbeid har Jarle vore med på å leggje grunnlaget for ei trygg og forsvarleg drift av kommunen gjennom mange år.

Når han no går inn i pensjonisttilværet, vil vi rette ein stor takk for innsatsen han har lagt ned for Nissedal kommune.

Vi ønskjer Jarle og familien alt godt i åra som kjem, med meir tid til interesser, familie, venner og nye opplevingar.

Takk for innsatsen gjennom 29 år, Jarle!